ਸਟ੍ਰੇਟ ਆਫ਼ ਹੋਰਮੁਜ਼ ਕੀ ਹੈ ਅਤੇ ਇਹ ਕਿੱਥੇ ਸਥਿਤ ਹੈ?
ਸਟ੍ਰੇਟ ਆਫ਼ ਹੋਰਮੁਜ਼ ਦੁਨੀਆਂ ਦੇ ਸਭ ਤੋਂ ਮਹੱਤਵਪੂਰਨ ਸਮੁੰਦਰੀ ਵਪਾਰਕ ਰਸਤਿਆਂ ਵਿੱਚੋਂ ਇੱਕ ਹੈ ਅਤੇ ਤੇਲ ਦੀ ਆਵਾਜਾਈ ਲਈ ਸਭ ਤੋਂ ਅਹਿਮ ਤੰਗ ਜਗ੍ਹਾ (ਚੋਕ ਪੋਇੰਟ) ਮੰਨੀ ਜਾਂਦੀ ਹੈ।
ਇਸ ਦੇ ਉੱਤਰ ਵੱਲ ਈਰਾਨ ਅਤੇ ਦੱਖਣ ਵੱਲ ਓਮਾਨ ਅਤੇ ਸੰਯੁਕਤ ਅਰਬ ਅਮੀਰਾਤ ਸਥਿਤ ਹਨ। ਇਹ ਜਲ ਮਾਰਗ ਆਪਣੇ ਦਾਖ਼ਲੇ ਅਤੇ ਨਿਕਾਸ ‘ਤੇ ਲਗਭਗ 50 ਕਿਲੋਮੀਟਰ (31 ਮੀਲ) ਚੌੜਾ ਹੈ ਅਤੇ ਆਪਣੇ ਸਭ ਤੋਂ ਤੰਗ ਹਿੱਸੇ ‘ਤੇ ਲਗਭਗ 33 ਕਿਲੋਮੀਟਰ ਚੌੜਾ ਹੈ। ਇਹ ਖਾੜੀ ਨੂੰ ਅਰਬ ਸਾਗਰ ਨਾਲ ਜੋੜਦਾ ਹੈ।
ਇਹ ਜਲ ਮਾਰਗ ਦੁਨੀਆਂ ਦੇ ਸਭ ਤੋਂ ਵੱਡੇ ਕੱਚੇ ਤੇਲ ਵਾਲੇ ਟੈਂਕਰਾਂ ਲਈ ਕਾਫ਼ੀ ਡੂੰਘਾ ਹੈ ਅਤੇ ਮੱਧ ਪੂਰਬ ਦੇ ਮੁੱਖ ਤੇਲ ਅਤੇ ਗੈਸ ਉਤਪਾਦਕ ਦੇਸ਼ ਅਤੇ ਉਨ੍ਹਾਂ ਦੇ ਗਾਹਕ ਇਸਦਾ ਇਸਤੇਮਾਲ ਕਰਦੇ ਹਨ।
