ਇਸਲਾਮਾਬਾਦ ਨੇ ਅਫਗਾਨਿਸਤਾਨ ਅਤੇ ਪਾਕਿਸਤਾਨ ਦੀ ਸਾਂਝੀ ਸਰਹੱਦ ‘ਤੇ ਮੁੜ ਹੋਈ ਝੜਪਾਂ ਤੋਂ ਬਾਅਦ ਅਫਗਾਨ ਤਾਲਿਬਾਨ ਸਰਕਾਰ ਵਿਰੁੱਧ “ਖੁੱਲ੍ਹੀ ਜੰਗ” ਦਾ ਐਲਾਨ ਕਰ ਦਿੱਤਾ ਹੈ।
ਤਣਾਅ ਉਸ ਵੇਲੇ ਵਧਿਆ ਜਦੋਂ ਪਾਕਿਸਤਾਨ ਨੇ ਸ਼ੁੱਕਰਵਾਰ ਨੂੰ ਅਫਗਾਨਿਸਤਾਨ ਦੇ ਕਾਬੁਲ ਅਤੇ ਕੰਦਹਾਰ ‘ਤੇ ਬੰਬਬਾਰੀ ਕੀਤੀ। ਇਹ ਹਮਲੇ ਉਸ ਤੋਂ ਕੁਝ ਘੰਟਿਆਂ ਬਾਅਦ ਕੀਤੇ ਗਏ ਜਦੋਂ ਅਫਗਾਨ ਫੌਜਾਂ ਨੇ ਪਾਕਿਸਤਾਨੀ ਸਰਹੱਦੀ ਸੈਨਿਕਾਂ ‘ਤੇ ਹਮਲਾ ਕੀਤਾ ਸੀ। ਤਾਲਿਬਾਨ ਸਰਕਾਰ ਦੇ ਮੁਤਾਬਕ ਇਹ ਕਾਰਵਾਈ ਇਸ ਹਫ਼ਤੇ ਦੇ ਸ਼ੁਰੂ ਵਿੱਚ ਕੀਤੇ ਗਏ ਮਾਰੂ ਹਵਾਈ ਹਮਲਿਆਂ ਦਾ ਬਦਲਾ ਸੀ।
ਪਾਕਿਸਤਾਨ ਦੇ ਰੱਖਿਆ ਮੰਤਰੀ ਖ਼ਵਾਜਾ ਆਸਿਫ ਨੇ ਐਕਸ (X) ‘ਤੇ ਲਿਖਿਆ, “ਸਾਡੀ ਸਬਰ ਦੀ ਹੱਦ ਖਤਮ ਹੋ ਚੁੱਕੀ ਹੈ। ਹੁਣ ਸਾਡੇ ਅਤੇ ਤੁਹਾਡੇ ਵਿਚਕਾਰ ਖੁੱਲ੍ਹੀ ਜੰਗ ਹੈ।”
ਹਿੰਸਾ ਵਧਣ ਦੇ ਨਾਲ, ਦੋਵੇਂ ਫੌਜਾਂ ਨੇ ਦਾਅਵਾ ਕੀਤਾ ਕਿ ਉਨ੍ਹਾਂ ਨੇ ਦੂਜੇ ਪਾਸੇ ਦੇ ਦਰਜਨਾਂ ਸੈਨਿਕ ਮਾਰ ਦਿੱਤੇ ਹਨ, ਜਿਸ ਕਾਰਨ ਕਤਰ ਦੀ ਮਧਸਥਤਾ ਨਾਲ ਹੋਈ ਜੰਗਬੰਦੀ ਕਾਫੀ ਕਮਜ਼ੋਰ ਦਿਖਾਈ ਦੇ ਰਹੀ ਹੈ।
ਅਫਗਾਨਿਸਤਾਨ ਦਾ ਦਾਅਵਾ
ਕਾਬੁਲ ਵਿੱਚ ਘੱਟੋ-ਘੱਟ ਤਿੰਨ ਧਮਾਕਿਆਂ ਦੀਆਂ ਆਵਾਜ਼ਾਂ ਸੁਣੀਆਂ ਗਈਆਂ, ਪਰ ਹਮਲਿਆਂ ਦੀ ਸਹੀ ਥਾਂ ਜਾਂ ਸੰਭਾਵਿਤ ਹਲਾਕਤਾਂ ਬਾਰੇ ਤੁਰੰਤ ਕੋਈ ਜਾਣਕਾਰੀ ਨਹੀਂ ਮਿਲੀ। ਤਾਲਿਬਾਨ ਸਰਕਾਰ ਦੇ ਪ੍ਰਵਕਤਾ ਜ਼ਬੀਹੁੱਲਾਹ ਮੁਜਾਹਿਦ ਨੇ ਕਿਹਾ ਕਿ ਪਾਕਿਸਤਾਨ ਨੇ ਦੱਖਣੀ ਸ਼ਹਿਰ ਕੰਦਹਾਰ ਅਤੇ ਦੱਖਣ-ਪੂਰਬੀ ਸੂਬੇ ਪਕਤੀਆ ਵਿੱਚ ਵੀ ਹਵਾਈ ਹਮਲੇ ਕੀਤੇ ਹਨ।
ਇਸ ਤੋਂ ਕੁਝ ਘੰਟੇ ਪਹਿਲਾਂ, ਅਫਗਾਨਿਸਤਾਨ ਨੇ ਕਿਹਾ ਕਿ ਉਸਦੀ ਫੌਜ ਨੇ ਵੀਰਵਾਰ ਦੇ ਦੇਰ ਰਾਤ ਸਰਹੱਦ ਪਾਰ ਕਰਕੇ ਪਾਕਿਸਤਾਨ ‘ਤੇ ਹਮਲਾ ਕੀਤਾ, ਜੋ ਕਿ ਪਿਛਲੇ ਐਤਵਾਰ ਅਫਗਾਨ ਸਰਹੱਦੀ ਇਲਾਕਿਆਂ ‘ਤੇ ਕੀਤੇ ਗਏ ਪਾਕਿਸਤਾਨੀ ਹਵਾਈ ਹਮਲਿਆਂ ਦਾ ਬਦਲਾ ਸੀ। ਅਫਗਾਨਿਸਤਾਨ ਨੇ ਦਾਅਵਾ ਕੀਤਾ ਕਿ ਉਸਨੇ ਪਾਕਿਸਤਾਨੀ ਫੌਜ ਦੇ ਦਰਜਨ ਤੋਂ ਵੱਧ ਚੌਕੀਆਂ ਕਬਜ਼ੇ ਵਿੱਚ ਲੈ ਲਈਆਂ ਹਨ।
ਅਫਗਾਨ ਰੱਖਿਆ ਮੰਤਰਾਲੇ ਨੇ ਕਿਹਾ ਕਿ ਇਸ ਜਮੀਨੀ ਕਾਰਵਾਈ ਵਿੱਚ ਉਸਦੇ ਅੱਠ ਸੈਨਿਕ ਵੀ ਮਾਰੇ ਗਏ ਹਨ।
ਇੱਕ ਅਫਗਾਨ ਅਧਿਕਾਰੀ ਨੇ ਏਐਫਪੀ ਨਿਊਜ਼ ਏਜੰਸੀ ਨੂੰ ਦੱਸਿਆ ਕਿ ਤੋਰਖਮ ਸਰਹੱਦੀ ਚੌਕੀ ਨੇੜੇ ਪਾਕਿਸਤਾਨ ਤੋਂ ਵਾਪਸ ਆ ਰਹੇ ਲੋਕਾਂ ਦੇ ਕੈਂਪ ਵਿੱਚ ਕਈ ਨਾਗਰਿਕ ਜ਼ਖ਼ਮੀ ਹੋਏ ਹਨ। ਨੰਗਰਹਾਰ ਸੂਬੇ ਦੇ ਜਾਣਕਾਰੀ ਮੁਖੀ ਕੁਰੈਸ਼ੀ ਬਦਲੂਨ ਨੇ ਕਿਹਾ, “ਇੱਕ ਮੋਰਟਾਰ ਗੋਲਾ ਕੈਂਪ ਵਿੱਚ ਆ ਡਿੱਗਿਆ ਅਤੇ ਦੁੱਖ ਦੀ ਗੱਲ ਹੈ ਕਿ ਸਾਡੇ ਸੱਤ ਸ਼ਰਨਾਰਥੀ ਜ਼ਖ਼ਮੀ ਹੋਏ ਹਨ, ਜਿਨ੍ਹਾਂ ਵਿੱਚੋਂ ਇੱਕ ਔਰਤ ਦੀ ਹਾਲਤ ਗੰਭੀਰ ਹੈ।”
ਅਕਤੂਬਰ ਤੋਂ ਲੜਾਈ ਕਾਰਨ ਸਰਹੱਦ ਵੱਡੇ ਪੱਧਰ ‘ਤੇ ਬੰਦ ਹੈ, ਹਾਲਾਂਕਿ ਵਾਪਸੀ ਕਰ ਰਹੇ ਅਫਗਾਨ ਨਾਗਰਿਕਾਂ ਨੂੰ ਪਾਰ ਕਰਨ ਦੀ ਇਜਾਜ਼ਤ ਦਿੱਤੀ ਗਈ ਹੈ।
ਪਾਕਿਸਤਾਨ ਦਾ ਦਾਅਵਾ
ਐਸੋਸੀਏਟਡ ਪ੍ਰੈਸ ਦੀ ਰਿਪੋਰਟ ਮੁਤਾਬਕ, ਪਾਕਿਸਤਾਨੀ ਫੌਜ ਨੇ ਕਾਬੁਲ, ਕੰਦਹਾਰ ਅਤੇ ਪਕਤੀਆ ਸੂਬਿਆਂ ਵਿੱਚ ਅਫਗਾਨ ਸੈਨਿਕ ਠਿਕਾਣਿਆਂ ਨੂੰ ਨਿਸ਼ਾਨਾ ਬਣਾਇਆ ਅਤੇ ਦੋ ਬ੍ਰਿਗੇਡ ਅੱਡਿਆਂ ਨੂੰ ਤਬਾਹ ਕਰਨ ਦਾ ਦਾਅਵਾ ਕੀਤਾ, ਹਾਲਾਂਕਿ ਕਿਸੇ ਹਲਾਕਤ ਬਾਰੇ ਕੁਝ ਨਹੀਂ ਦੱਸਿਆ ਗਿਆ।
ਪਾਕਿਸਤਾਨੀ ਸਰਕਾਰ, ਜਿਸਨੇ ਪਿਛਲੇ ਐਤਵਾਰ ਦੇ ਹਵਾਈ ਹਮਲਿਆਂ ਨੂੰ ਇਲਾਕੇ ਵਿੱਚ ਪਨਾਹ ਲਏ ਹੋਏ ਉਗਰਵਾਦੀਆਂ ਵਿਰੁੱਧ ਕਾਰਵਾਈ ਕਰਾਰ ਦਿੱਤਾ ਸੀ, ਨੇ ਵੀਰਵਾਰ ਦੇ ਅਫਗਾਨ ਹਮਲੇ ਨੂੰ ਬਿਨਾਂ ਉਕਸਾਵੇ ਦੇ ਦੱਸਿਆ ਅਤੇ ਫੌਜੀ ਚੌਕੀਆਂ ਕਬਜ਼ੇ ਵਿੱਚ ਲਏ ਜਾਣ ਦੇ ਦਾਅਵਿਆਂ ਨੂੰ ਖਾਰਜ ਕੀਤਾ।
ਪਾਕਿਸਤਾਨ ਦੇ ਜਾਣਕਾਰੀ ਮੰਤਰੀ ਅੱਤਾਊੱਲਾਹ ਤਰਾਰ ਨੇ ਐਕਸ ‘ਤੇ ਲਿਖਿਆ, “ਕਾਬੁਲ, ਪਕਤੀਆ ਅਤੇ ਕੰਦਹਾਰ ਵਿੱਚ ਅਫਗਾਨ ਤਾਲਿਬਾਨ ਦੇ ਰੱਖਿਆ ਟੀਚਿਆਂ ਨੂੰ ਨਿਸ਼ਾਨਾ ਬਣਾਇਆ ਗਿਆ ਹੈ,” ਅਤੇ ਇਸਲਾਮਾਬਾਦ ਨੇ ਸਰਹੱਦ ਪਾਰ ਤੋਂ “ਬਿਨਾਂ ਉਕਸਾਵੇ ਦੀ ਗੋਲੀਬਾਰੀ” ਦੇ ਜਵਾਬ ਵਿੱਚ ਅਫਗਾਨ ਤਾਲਿਬਾਨ ਵਿਰੁੱਧ ‘ਆਪਰੇਸ਼ਨ ਗਜ਼ਬੁਲ-ਹਕ’ ਸ਼ੁਰੂ ਕਰਨ ਦਾ ਐਲਾਨ ਕੀਤਾ।
ਪਾਕਿਸਤਾਨ ਦੇ ਸਰਕਾਰੀ ਪ੍ਰਸਾਰਕ ਪੀਟੀਵੀ ਨਿਊਜ਼ ਨੇ ਦੱਸਿਆ ਕਿ ਪਾਕਿਸਤਾਨੀ ਫੌਜਾਂ ਨੇ ਕਾਬੁਲ, ਕੰਦਹਾਰ ਅਤੇ ਪਕਤੀਆ ਵਿੱਚ ਅਫਗਾਨ ਤਾਲਿਬਾਨ ਦੀਆਂ ਅਹਿਮ ਫੌਜੀ ਸਥਾਪਨਾਵਾਂ ਨੂੰ ਨਿਸ਼ਾਨਾ ਬਣਾਇਆ ਹੈ। ਰਿਪੋਰਟ ਵਿੱਚ ਦਾਅਵਾ ਕੀਤਾ ਗਿਆ ਕਿ ਕਾਬੁਲ ਵਿੱਚ ਘੱਟੋ-ਘੱਟ ਦੋ ਬ੍ਰਿਗੇਡ ਮੁੱਖ ਦਫ਼ਤਰ ਤਬਾਹ ਕਰ ਦਿੱਤੇ ਗਏ ਹਨ, ਜਦਕਿ ਕੰਦਹਾਰ ਵਿੱਚ ਇੱਕ ਕੋਰ ਮੁੱਖ ਦਫ਼ਤਰ ਅਤੇ ਇੱਕ ਬ੍ਰਿਗੇਡ ਮੁੱਖ ਦਫ਼ਤਰ ਨਸ਼ਟ ਕੀਤਾ ਗਿਆ ਹੈ। ਇਸ ਤੋਂ ਇਲਾਵਾ ਕੰਦਹਾਰ ਵਿੱਚ ਗੋਲਾ-ਬਾਰੂਦ ਡਿਪੋ ਅਤੇ ਲੋਜਿਸਟਿਕ ਅੱਡਾ ਤਬਾਹ ਕੀਤਾ ਗਿਆ ਹੈ ਅਤੇ ਪਕਤੀਆ ਵਿੱਚ ਇੱਕ ਕੋਰ ਮੁੱਖ ਦਫ਼ਤਰ ਨੂੰ ਨਸ਼ਟ ਕਰਨ ਦਾ ਵੀ ਦਾਅਵਾ ਕੀਤਾ ਗਿਆ ਹੈ।